Kira-kira 300 taon jang laloe, keadaan di Tiongkok ada kaloet lantaran
terbitnja hoeroe-hara, bangsa Boan telah goenakan itoe kans boeat
masoek liwatin tembok besar dan mengadoek kita poenja tanah leloehoer,
hingga achirnja marika bisa mendjadjah Tiongkok, dengen tinggal teroes
sebagi radja, tegesnja itoe saat negri kita termoesna dan bangsa kita
mendjadi boedak, hingga tida satoe benda jang bisa terloepoet dari
perampokan.
Oleh kerna itoe telah moentjoel banjak orang-orang gagah, tapi
berbareng dengen moentjoelnja orang-orang berboedi, pamerentah Tjeng
djoega lantas lakoeken penindesan pada marika jang bersoemanget, di
mana-mana diadaken larangan jang bengis dan kedjem.
Toch soemanget bangsa Tionghoa teroes berkobar, bebrapa orang jang
mempoenjai angen-angen „TIDA MAOE MAKAN NASI TJENG, TIDA AKEN INDJEK
TANAH TJENG" telah anggep Tjengtiauw dari bangsa Boan sebagi marika
poenja moesoeh dan sebar bibit kadermawanan terhadep bangsanja; agar
marika bisa mendjadi saorang jang mempoenjai soemanget laki-laki
aseli, djoega itoe kawanan penjinta negri ada bikin pergerakan boeat
basmi penghianat dan bikin pembalesan, dengen reboet kombali tanah
daerahnja jang soeda ilang.
Lantaran mana di permoelaan keradjaan Tjeng, di tempat-tempat sepi
banjak sekali terdapet orang gagah jang oempetken diri, marika sering
goenaken kepandean bitjaranja boeat lakoeken propaganda antara
pendoedoek, soepaja bisa mengerti terlebih terang keadaannja sendiri,
atawa dengen mengandel sama kagagahannja jang loear biasa boeat
lakoeken pemboenoehan gelap terhadep pembesar-pembesar agoeng atawa
kalangan radja, marika biasa keloear masoek di kraton terlarang zonder
meninggalken barang sedikit bekas.
Tegesnja marika soeka ganggoe keadaan dari pamerentahan Tjeng dengen
berbagi-bagi djalan jang berada di loear doegaan, dan segala
perboeatan marika soeka mengedjoetken, hingga pembesar-pembesar jang
kabanjakan terdiri dari penghianat bangsa, djadi pada katakoetan sekali.
Perboeatannja itoe kawanan orang gagah jang menjinta negri ada sanget
menggirangken hati bangsa kita, dan mendjadi tjonto bagi marika jang
berhati lembek tapi membandel, djoega boeat kita bisa digoenaken
sebagi bahan pembitjaraan antara temen-temen.
Berhoeboeng dengen banjaknja kedjadian dari itoe kawanan orang gagah,
maka telah sengadja dikoempoel ratoesan matjem hal loear biasa di
djeman Tjeng, boeat didjadiken boekoe, dan achir nja toean Yo Tien In,
pengarang jang terkenal, telah berhasil bikin ini boekoe 'Kang Ouw
Djie Sie Hiap'.
Toedjoean ini boekoe: Menanem bibit kabatinan, dan bikin rahajat lebih
mengerti soeal jang menjangkoet kebangsaan, sekalian soepaja bisa
mengenal lebih baek dalem hal ilmoe silat Tionghoa, dan andjoerin
rahajat soepaja mempoenjai soemanget kabangsaan.
Loekisan dari ini boekoe: Goenaken djeman dari permoelaan keradjaan
Tjeng, di mana rahajat bikin pergerakan boeat merdikaken negrinja
de¬ngen soesa paja, dan oendjoek djoega bagimana penghianat Tionghoa
jang soeka djadi boedak Boan djilat-djilat madjikannja, hingga sering
terdjadi penganiajahan, dan djelasken djoega sesoeatoe perboeatan
mentereng dari kawanan pendekar jang pande dan menjinta negri.
Maksoednja ini boekoe: Lantaran maoe membangoenken soemanget
kabangsaan, maka ada ambil tjerita dari gerakan anti Tjeng dengen
niatan berdiriken poela pamerentah Beng, tapi boeat bisa sampeken
maksoed mana, lebih doeloe haroes basmi penghianat bangsa, maka ada
diterangken 64 orang gagah dengen soemanget besar bergoelet sakerasnja
terhadep kawanan pendjahat jang tjilakaken rahajat, dan kawanan
Patkwa-kauw serta Peklian-kauw jang bersariket sama penghianat bangsa.
Soeroep dengen kawanan patriot dari Shanghai di ini djeman, jang
selaloe maoein djiwanja segala boneka Djepang!
Sifatnja ini boekoe: Ada berlaenan dengen la¬en boekoe, kerna di sini
ada mengandoeng sifat-sifat dari tjerita jang menjangkoet sama
Kabangsaan, hikajat, politiek, sociaal, ilmoe silat, spionage,
militair, kadermawanan, keadahan rahajat djadjahan dan laen-laen lagi,
jang nanti bila soeda dibatja teroes baroe aken katahoean.
Bahan-bahan boeat ini boekoe ada terambil dan meloekisken kedjadian
menjedihken di achir keradjaan Beng, resia-resia kraton di permoelaan
ahala Tjeng, penganiajahan terhadep orang-orang terpeladjar, kagagahan
orang-orang gaib jang boenoeh moesoehnja, resia-resia dari kaoem
pergerakan, kawanan pendekar koeda dari bilangan Boantjioe dan
laen-laennja lagi jang bisa dipertjaja. Lantaran mana ini boekoe jang
meloekis¬ken kedjadian menoeroet keadaan sewadjarnja dari permoelaan
keradjaan Tjeng, orang boleh anggep sebagi batjaan hikajat boeat
mengatahoei keada¬an di djeman terseboet.
Lebih djaoe aken diloekisken setjara djelas kaserakahan dari kawanan
pembesar jang terkoetoek, perboeatan-perboeatan djahat seperti
memperkosa, merampok, menipoe dan laen-laennja lagi; dalem bagian
pertempoeran djoega aken bikin pembatjanja djadi meresep betoel-betoel.
Ini tjerita ada pandjang, dengen djoemblah hoofdrolen jang banjak,
tapi aken menjamboeng satoe sama laen sehingga tamat.
Permoelaannja tida loepa diseboet-seboet nama-nama dari orang-orang
terkenal di achir ahala Beng, antaranja seperti The Seng Kong, Koo
Teng Lim dan laen-laennja, tapi jang memegang rol teroetama dari 'Kang
Ouw Djie Sie Hiap' adalah terdiri dari 10 orang gaib, 24 pendekar dan
30 giesoe, sama sekali 64 orang, aken diloekisken marika poenja tabeat
dan kepandean jang satoe sama laen ada berbeda, jang mana pembatja
nanti aken bisa boektiken sendiri.
Bagimana soeker ini boekoe telah dikarang, terboekti dengen tempo jang
telah diambil belasan taon, boeat koempoel sampe rampoeng, ini tjerita
dari ratoesan matjem boekoe-boekoe koeno jang didjadiken bahannja,
antara mana terdapet satoe boekoe Japan.
Pengarangnja telah robah dan robah lagi iapoenja karangan sampe 8-9
kali, hingga kertas copy jang tida kepake bisa dikata
bertoempoek-toempoek seperti djoega goenoeng, jang achirnja bisa
meroepaken ini terbitan besar dengen sama sekali kira-kira terdiri
dari 1.000.000 hoeroef Tionghoa! Dan terbagi dalem 120 fatsal!
 |
 |
| Rp | |
| Hemat Rp 75.000 | |
| Rp 425.000 | |
 | |
| i | |
 |
| Judul | Kang Ouw Djie Sie Hiap #1-#3 (Tamat) |
| No. ISBN | - |
| Penulis | Hay Teng Djin & Liok Djie Seng |
| Penerbit | Dwitama Asrimedia |
| Tanggal terbit | 2008 |
| Jumlah Halaman | - |
| Berat Buku | 2750 gr |
| Jenis Cover | Hard Cover |
| Dimensi(L x P) | - |
| Kategori | Saduran |
| Bonus | - |
| Text Bahasa | Indonesia ·· |
| Lokasi Stok | gudang bukukita  |
